ابوذيات متنوعة

عليك اسئل ولا تسئل يناسي
تبريتو شعجب مني يناسي
خوة هل وكت صارت يناسي
بس النسب يربطهم سوية
-----------------------------
جمالك دوّخ العالم وصدرك
وحطّك ابوس كلبي وصدرك
سيستاني فلا يكدر وصدرك
عن حبك يصدني والمرجعيه
------------------------------
احبك من صغر سنك وريدك
الك آنه اقرب من وريدك
حبيبي بس علي دوّر وريدك
تلكاني ويه نبضك سويه
------------------------------------
بجيت ونزلن ادموعي على شفاي
وطب لندن مايكدر على شفاي
وحبيبي من تحط شفتك على شفاي
اطيب وما يضل كل الم بيه
-------------------------------
هلي خلو علي حراس ..وعيون
ومن دمعي جرى نهرين.. وعيون
شلون خدود عندك ياولف.. وعيون
كبار ويامحلا نظرتهن علية
---------------------------------
انا العطشان منك مي أتاني
ومثل صبري بغيابك من يتاني
تگلي شلون صحتك ميت اني
وبعدك روحي عرفته المنيه
---------------------------------
بعد ما ادخل لدارك وطُبها
يالناسي دوة جروحي وطَبها
لحلف بدساتير العشك وطُبها
انا العشكتك وانت الخنت بية
------------------------------------
خواتي بالمشي وياي هدن
بية جروح لو بس جرح هدن
الف يا حيف غربة وياي هدن
واول ما طحت لطمن علية
----------------------------------
غرامك بالعشك اثر ودارة
هجرت الي تعب وياك ودارك
سمعت بقيس عاف اهلة ودارة
حملت الضيم و همومك سوية
-------------------------------------------
شاب الراس من هجرك دواوين
انة بحيك صرت اطبع دواوين
مريض ومرضي وين الكة دواوين
دوا حضنك يهل مبعد علية
--------------------------------------
يانور العين مرسالك وصلنه
ودمع العين بلل كل وصلنه
امانه عليك لاتكطع وصلنه
وخلي دوم عشرتنه سويه
---------------------------------
حلو إسمك وأبوك شلون سماك
حبيبك لو زعل وياك سماك
صرت سمچه وانت الصرت سماك
لو طحت بحنانك إعطف عليه
--------------------------------
سلطه وجاه الك يمي ولك مال
وگلبي ماعشگ غيرك ولك مال
ألله يساعد الراسب والاكمال
والناجح ألف رحمه على ابيه .
-------------------------------------------
وحق طه ونبي عيسى وصالح
بغرامك اني مخلص وصالح
لشوكت تظل تتزعل وصالح
شمحلاته العشك لو نفرح سويه.
----------------------------------
راح الغالي وانت بعيد ياخوي بس عود
وخفف عليه الضيج والخنگة بس عود
عيدان ظهري تكسرن وما بقى بس عود
ارجع يالعزيز ولمنه سويه
----------------------------------
السنــــــــــي..
ابد منكول محنه وننتمحنه
وطنه وبيك نبني وانته محنه
اذا صرنه احنه انتم وانتم احنه
عدونه يصير بحلوگ المنيه
الـــرد....
الشيعـــــــــي..
نريد بشؤگ ولفي وننتمنى
وسلوى احنه بجفاك وانتو منى
اذا صرنه احنه منكم وانتو منى
عدونه يصير بحلوگ المنيه
--------------------------------
حديقه بعلم رب الكون ضليت
وعن درب العلم يا ناس ضليت
شجره وبس عله العاوين ضليت
وصرت سايق مخده وجودليه
-------------------------