نصائح وإرشادات للسُواح القادمين إلى العراق لغرض السياحة

السلام عليكم

شلونكم شلع

هذه نصائح وإرشادات للسُواح القادمين إلى العراق لغرض السياحة والترفيه أقدمها مجاناً إلى زُوار أرض الرافدين ومهد الحضارات ( العراق الجريح ) عزيزي السائح

ما إن تُقرر زيارة العراق ، ما عليك إلا إتباع الإرشادات التالية والتي تجعل إقامتك هنا مريحة وجميلة وهي

كلآتي

أولا: لا تحاول السفر بالطائرة لأسباب عديدة منها اننا نخاف ( علي جيبك ) لأن كلفة السفر غالية جداً ومنها أيضا ان منطقة المطار قد تحوي إشعاعات ذرية قديمة أو مواد مسرطنة من الأسلحة التي تم إستعمالها أثناء الحرب ..ومنها أنك قد تتعرض لإطلاق صواريخ مضادة للطائرات ( وتروح بالباي باي) لو فد عبوة ناسفة على طريق المطار وهم تروح ( بالباي باي )

ثانيا: في حالة قدومك بالسيارة خذ معك ( يطغ ومخدة وبطانية ) لأن راح تنتظر دورك في الدخول للأراضي العراقية وربما يستمر إنتظارك فد يوم أو يومين ( إنت وحظك ) وأثناء الإنتظار لازم تنام ..ولازم تنام رغد همين

ثالثاً: بعد أن دخلت بسلام وأمان إلى الحدود العراقية وفي طريقك الآن إلى بغداد..(ضُم) فلوسك ودولاراتك بفد زوية بالسيارة لو جوة لسانك لو بأي مكان لحين عبور ( منطقة السلابة ) لأن إذا سلبوك..تره توصل لبغداد ( أيد من وره وأيد من كدام ) .. ونشوفك تجدي يم الجوامع

رابعا: معظلة دخول بغداد..قد تنتظر فد ساعة لو ساعتين ومرات أكثر ..والسبب .لو عبوة لو رتل امريكي لو حرس وطني لو تفتيش...وهنا تظهر فائدة ( اليطغ ) مرة اُخرى ...علمود تاخذلك فد ( غفّة )

ساعتين علما ينفتح الطريق

خامسا: وصلت بغداد..حمد لله على السلامة..دير بالك تروح لشيراتون لو لمريديان لو لميليا لو للرشيد...ترة كلها مستهدفة..شوفلك فد فندق عتيك بالبتاوين لو بالميدان اشرفلك

سادسا: أول ليلة إشرب فاليوم 20 علمود تنام وماتسمع أصوات الطيارات لو الطلقات لو الإنفجارات يلي إنت اكيد ممتعود تسمعها وHappy Dreams مقدماً

سابعاً: من الصبح .أكيد تريد تتريك...لا تتريك..ترة وقت الذروة للمفخخات الصبح..وبالأخص باب الشرقي والكرادة فلا تطلع لا منا ولا منا وإتحمل جوع أستر إلك

ثامنا: جا وكت الغدا..أكيد ميت جوع..لو عليّ أكلك هم للتغدة ..بس إنت خطية..إطلع روح إتغده..بس إتجنب المكانات المشهورة..قاسم ابو الكَص بالأعظمية ..الساعة بالمنصور ..مدري شسمه يلي بمدري وين ..قصر بجمع..كل المكانات ترة مستهدفة..إقضيها ( صنبة وعمون ) ( أقصد عنبة وصمون ) لو فلافل على السريع وإرجع للفندق

تاسعاً: أخاف عبالك إنت بسويسرا لو بباريس وتريد تسهر ( بالشانزليزه) تالي الليل ...تره إحنا هنا حريصين على صحتك والمثل يكول ( نم مبكرا تستيقض مبكرا ) لذلك حكومتنا الديمقراطية الرشيدة واستنادا الى مبدأ الحرية الجديد آثرت أن تمنع التجوال من الساعة 9 ليلا علمود ترجع تنام من وكت

عاشرا: هسة جا الليل كرّز حب وإن تتفرج على ( العراقية ) الطائفية وإشبع قهر

وإنغث مثل ما إحنا شابعين قهر ومغثوثين منها وإذا ما عجبتك أكو الديار والفرات والكوثر والفيحاء ووو..ووو.. ووو و( فرجة ممتعة )

حادي عشر: ثاني يوم إنت صرت سبع ومتخاف وتريد تتمشة ببغداد..أهم شي ..أهم شي ..أن تشيل هويتك..ترة والله إذا لزمتك شرطة صولاغ مشايل هويتك..ينسوك الحليب يلي رضعته ويرفهوك آخر ترفيه بكل الوسائل الممتعة كالدريل والكوسرة والساطور والولدنك ونصيحة أخرى..لا تمشي يم الرصيف ..ترة كل الأرصفة عبوات ناسفة..وإذا شفت فد كيس مال زبل لو كارتونة وية الزبالة او فلينه ..( أكلب ) قبل ما تنفجر

بيك

ثاني عشر: قررت تستأجر سيارة لأن تعبت من الكيات لو من المشي...قرار صائب وحكيم ..بس لازم أولا.. تطلع روحك من الإزدحامات لو من الجسور المغلقة..هاي وحدة..وأكو فد سيارات مكتوب عليها حرس وطني او شرطة او فد ( مسعور ) العفو ( مسعول ) العفو (مسؤووووول) وبيها ناس لابسين اقنعة ومناظر سودة ( إتخبل ) وأكيد يعلجون علج ويدخنون هذولة ( حماة الوطن )..مو عبالك إنت بلندن وتجي تقترب منهم لو تتجاوزهم ..ترة الجماعة ينطوك درس عملي عنوانه..( المنخل البشري )

ثالث عشر: إذا كان حظك عاثر جداً وإنفجرت سيارة مفخخة لو كدامك لو وراك...هاي يلي الله كتبها عليك...اذا تنهزم ..يكولون هذا إرهابي ..واذا تبقى .هم يكولون هذا إرهابي ..لذلك إجرح نفسك..وطلع الدم من راسك من رجلك من إيدك من اي مكان..وخلي يشيلوك للمستشفى أحسن إلك

رابع عشر: رجعت للفندق مالتك..وما أدري إذا بعد مقرر تبقى وتزور باقي مناطق بغداد وتزور المعالم الحضارية والأثرية وتتجول بالمحافظات يم الثرثار لو بالحبانية لو بالملوية.. لذلك راح أتوقف عن نصائحي إلك ..لحين ما تقرر بقاءك من

عدمه وبعدها أكمّل نصائحي لك

ههههههههههههههههه عاشت ايدك حمودي هههههههه

ههههههههههههههههههههههههه

عاااااشت ايدك حمودي

هع هع هع هع

تحياتي

ههههههههههههههه
ولو اني مقريتها كله بس روعه

» نصائح لطلاب الثانوية
» قصيدة العراق سيد الامم
» صور رائعه لجمهوريه العراق البطله
» صرنة جمهورية العراك مو العراق
» العراق يهزم الامارات بعد الكويت سوياً